Ramadan Jashari, një kardiokirurg shqiptar që jeton dhe vepron në Belgjikë, ka refuzuar pozitën e ministrit të Shëndetësisë në Qeverinë e Kosovës, sipas raportimit të Klan Kosovës.
Siç raporton televizioni Klan Kosova, emri i Ramadan Jasharit është propozuar brenda kabinetit qeveritar, por ai nuk ka pranuar pozitën e udhëheqësit të dikasterit qeveritar të shëndetësisë.
Jashari ka vendosur të vazhdojë veprimtarinë e tij në Belgjikë.
Në pozitën e ministrit të Shëndetësisë, kryeministri Albin Kurti emëroi sot Rifat Latifin.
Kirurgu shqiptar Latifi vepron dhe jeton në SHBA. Latifi është shef i Kirurgjisë së Përgjithshme në Qendrën Mjekësore Westchester në New York, profesor në Universitetin e Arizonës, anëtar i Kolegjit Amerikan të Kirurgëve dhe Kolegjit Ndërkombëtar të Kirurgëve, kryetar themelues i Kolegjit të Kirurgëve të Kosovës, që nga dhjetori i vitit 2018.
Në vitin 2009, Latifi ishte emëruar këshilltar për shëndetësi nga kryeministri i atëhershëm Hashim Thaçi.