Ish-eprori i Ushtrisë Çlirimtare të Kosovës, Sadik Halitjaha, i ftuar nga Prokuroria Speciale e Dhomave të Specializuara të Kosovës, ka udhëtuar drejt Hagës.
Njoftimin e ka bërë publik, Labinot Halitjaha, i afërm i tij.
“Sot shkruaj për kusheririn tim , për të cilin kam ndëgjuar si fëmijë se si organizonte protesta në vitet e 70-80, kundër okupatorit serb,e se si u largua nga vendi shkaku i përndjekjes nga pushtuesi, e si të kontribuonte në ekzil, parreshtur për vendin”, shkroi Labinot Halitjaha, në llogarinë e tij në Facebook .
Mësohet se Sadik Halitjaha ka udhëtuar drejt Hagës sot në mesditë, kurse njoftim më i hollësishëm nuk është bërë publik.
Por, me 19 tetor 2022, Halitjaha në llogarinë e tij në Facebook, ka shkruar lidhur me Gjykatën Speciale, duke deklaruar se:- “më mirë një fund i një të keqe, sesa një e keqe pa fund!”.
Madje, ai i ka bërë një parashikim se cilat do te ishin të këqijat më të mëdha, sesa krijimi i kësaj gjykate.
“Po të dështonte lufta e të kapitullonim pa kushte, të gjithë luftëtarët e mbetur gjallë do të gjykoheshin në Beograd, sepse këtu do të ishte Serbi!”, shkroi ai, ndër të tjera në këtë postim të gjatë.