Behxhet Xheladini, kandidati i LDK-së kryetar të Dragashit, e ka quajtur të paprecedentë vendimin për anulimin e fletëvotimeve nga diaspora.
Anulimi nga PZAP-ja i votave të ardhura nga diaspora ka përmbysur rezultatin në garën për kryetar të Komunës së Dragashit.
Tashmë, kandidati i LDK, Behxhet Xheladini, i cili printe ndaj kundër-kandidatit të tij nga PDK-ja, Shaban Shabani, pas vendimit të PZAP-së ndodhet 17 vota prapa rivalit të tij.
Por, Xheladini pret që Gjykata Supreme të vendos për anulimin e vendimit të PZAP-së dhe legjitimimin e votave të diasporës.
“Është një vendim i papritur dhe i paprecedentë i Panelit Zgjedhor për Ankesa dhe Parashtresa për votat e diasporës tonë nga Dragashi. Është po ashtu e pandershme që të shkatërrohet vullneti i qytetarëve, sidomos me faktin që janë anuluar votat e të gjithë votuesve nga diaspora”, tha Xheladini në KTV.