Kryeministri i Kosovës, Albin Kurti ka zhvilluar një vizitë në Estoni, derisa nuk dihet nëse ende po qëndron atje.
Megjithatë, shefi i Qeverisë së Kosovës ka shpërndarë një video nga pritja zyrtare që i ka bërë kryeministrja e Estonisë, Kaja Kallas.
Në videon e publikuar, në fillim, shihen veturat e zeza duke përcjellë kryeministrin deri në takim.
Ndërkaq, nuk dihet agjenda që e ka Kurti pas vizitës në Estoni.
Sidoqoftë, tashmë është konfirmuar se Bashkimi Evropian ka ftuar kryeministrin e Kosovës dhe presidentin serb, Aleksandër Vuçiq për t’u takuar rreth çështjes së targave.
Kurti, siç ka raportuar më herët Radio Evropa e Lirë, në lidhje me këtë temë theksoi se negociatat po vazhdojnë.
“Jemi duke bërë çmos për ta mbrojtur ligjshmërinë dhe kushtetutshmërinë e vendit tonë nga njëra anë dhe paqen e sigurinë nga ana tjetër. Unë jam optimist por qasja e Beogradit ka qenë shumë destruktive. Në ditët e ardhshme do të shohim se sa të suksesshëm do të jemi në negociatat e reja”, theksoi Kurti.
Radio Evropa e Lirë, duke u thirrur në burime të sigurta në Bruksel, më pas raportoi se takimi mund të mbahet të dielën pasdite, ose mëngjesin e së hënës.