Në Gllogjan të Deçanit, familjarët e viktimave kanë hapur të pame të përbashkët.
Njëri nga familjarët e nxënëses që humbi jetën mbrëmë nga sulmi me armë ka folur rreth ngjarjes.
Ai ka thënë se ngjarja ka ndodhur derisa autobusi ishte në mes të fshatit Gllogjan të Deçanit.
Ai ka thënë se djali i axhës së tij ishte i pranishëm në autobus derisa ndodhi sulmi. Sipas të afërmit të tij sulmuesi ishte larguar me qetësi nga vendi i ngjarjes.
“Rreth orës shtatë mbrëmë përderisa autobusi ishte në mes të fshatit ka ndodhur rasti. Sipas kallëzimit që e bën djali i axhës që ka qenë në autobus ai thotë se ka dalë një njeri me kapelë, maskë dhe kallashnikov, si dhe nga afërsia ka shtënë para autobusit”.
“Aty ka mbetur i vrarë shoferi, dy nxënësit janë plagosur dhe më pas nuk kanë mundur t’iu mbijetojnë plagëve të marra dhe kanë vdekur. Personi që ka shtënë është larguar me qetësi. Djali i axhës e ka thirrur babanë e tij, dhe ai kur ka shkuar kur e ka hap derën ka qenë një masakër, një tmerr, fëmijët kanë qentë të shastisur, kjo një ngjarje na ka shokuar”, ka thënë Mustafa për Klan Kosovën.