Ministri i Kulturës, Rinisë dhe Sportit, Hajrulla Çeku ka konfirmuar se ka ndarë 300 mijë euro nga buxheti i ministrisë për rinovimin e palestrës sportive në Komunën e Istogut.
Palestra sportive në Istog ka pësuar dëme të konsiderueshme vetëm tre vjet pas përurimit të saj.
Në seancën e sotme, ministri Çeku ka konfirmuar se kanë arritur marrëveshje me Komunën e Istogut për rinovimin e palestrës së sportit. Rinovimi i saj do të kushtojë plotë 550 mijë euro.
“Para pak ditësh me kryetarin e komunës së Istogut kemi nënshkruar marrëveshje për rinovimin e palestrës në Istog. Rinovimi i saj arrin vlerën e 550 mijë eurove, ministria ka ndarë 300 mijë euro, kurse komuna do të ndajë 250 mijë euro nga buxheti i tyre. Komuna do të marrë përsipër të gjitha kriteret dhe procedurat e hapjes së tenderit si dhe mbikëqyrjen e punimeve”, ka deklaruar ministri Çeku.
Palestra e sportit në Istog kishte filluar të ndërtohet në vitin 2004. Ajo ishte përuruar në tetor të vitit 2020 në ndeshjen e hendbollit mes Istogut dhe Vushtrrisë.
Kur kanë kaluar tre vjet nga përurimi zyrtar i saj, palestra e sportit në Istog është afër shkatërrimit.
Pas kushteve atmosferike jo edhe fort të mira, palestra ka pësuar dëme të konsiderueshme në çatinë dhe muret e saj.
Si pasojë e probleme në çati, palestra e sporteve është mbuluar e tëra nga uji.
Në këtë palestër ishin zhvilluar edhe ndeshje ndërkombëtare, ndërsa ishte paraparë që në prill të këtij vitit të zhvillohej edhe ndeshja kualifikuese për Kampionatin Botëror në hendboll.