Bazuar në një kërkesë të ministrit Arben Vitia, anëtarët e Bordit të Shërbimit Spitalor Klinik Universitar (ShSKUK) u mblodhën sot në një mbledhje urgjente për të trajtuar vdekjen e pacientit në Klinikën e Psikiatrisë mesnatën e së mërkurës.
Lajmin e ka bërë të ditur ShSKUK-ja përmes një njoftimi për media.
Në njoftimin e SHSKUK-së thuhet se mbledhja është mbajtur me kërkesë të ministrit të shëndetësisë Arben Vitia dhe se Bordi Drejtues ka kërkuar nga drejtori i përgjithshëm i ShSKUK-së, të ndërmarrë veprimet ligjore ndaj personave përgjegjës.
“Sot, Bordi Drejtues i ShSKUK-së, me kërkesë të ministrit të Shëndetësisë, Dr. Arben Vitia, ka mbajtur mbledhje të jashtëzakonshme ku pikë e vetme e rendit të ditës ishte ngjarja e fundit e ndodhur në Klinikën e Psikiatrisë. Pas diskutimeve, Bordi Drejtues ka kërkuar nga drejtori i përgjithshëm i ShSKUK-së, konform përgjegjësive dhe autorizimeve ligjore të bëjë vlerësim të gjendjes dhe bazuar në kompetencat e tij të ndërmarrë veprimet ligjore ndaj personave përgjegjës”, thuhet në njoftimin e SHSKUK-së.
Ndërsa në fund të komunikatës thuhet se do të ndërmerren veprime të tjera ligjore, me qëllim të parandalimit të rasteve të tilla.