Përzgjedhësi i Përfaqësueses së Zvicrës, Murat Yakin e sheh mesfushorin Granit Xhaka si një zëvendësim të mundshëm të tij në stolin e Zvicrës.
Në një intervistë për “20 Minuten”, Yakin ka folur në detaje për transferimet e futbollistëve zviceran gjatë merkatos së verës.
Xhaka është larguar nga Arsenali pas një periudhe 7 vjeçare duke u transferuar te skuadra e Bayern Leverkusen dhe me këtë veprim është pajtuar edhe përzgjedhësi Yakin.
“Nëse e njihni Granitin e dini që çdo gjë është e menduar deri në detaje. Situata në Leverkusen me trajnerin, kontratën dhe ambientin është ideale për të”, ka thënë Yakin.
Ai më pas është pyetur për shkollimin e Xhakës për trajner.
“Jam i lumtur për të gjitha opinionet dhe mendimet. Me njohuritë e tij dhe përvojën, nuk kam dyshim që Graniti mund të jetë trajner i suksesshëm. Por nuk është i vetmi”, ka thënë Yakin.
Ai mendon se edhe Manuel Akanji i ka të gjitha parakushtet që të jetë trajner i suksesshëm.
“A do të të zëvendësojnë Xhaka apo Akanji si trajner i Përfaqësueses kur të pensionohesh?”, ishte pyetja tjetër për Yakinin.
“Në një pikë u besoj absolutisht të dyve”, është përgjigjur Yakin.
Yakin të mërkurën do ta publikojë listën e futbollistëve për ndeshjen kundër Kosovës.
Zvicra do të përballet me Kosovën më 9 shtator në stadiumin “Fadil Vokrri” në Prishtinë, në kuadër të kualifikimeve për Kampionatin Evropian “Euro 2024”.