Zëdhënësi i Bashkimit Evropian, Peter Stano, ka thënë se vendimi për hapjen e urës kryesore në Ibër është temë e dialogut dhe se çdo veprim në këtë drejtim mund të ndërmerret vetëm në kuadër të dialogut ndërmjet Kosovës dhe Serbisë, e cila udhëhiqet me ndërmjetësimin e BE-së.
Në një konferencë për media në Bruksel, Stano ka theksuar se BE-ja nuk ka spekuluar asnjëherë për skenarë apo qëndrim të përgjithshëm kur bëhet fjalë për marrëveshjet që duhet të zbatohen në kuadër të dialogut, transmeton Paparaci.
“Është një qëndrim afatgjatë i Brukselit që vlen për të dyja palët. Çdo hap apo veprim i ndërmarrë apo i planifikuar për t’u ndërmarrë nga njëra apo tjetra palë në dialog, që mund të ndikojë në rrjedhën e bisedimeve, duhet të zgjidhet, diskutohet, ose si një nga temat e dialogut nën mbikëqyrjen e BE-së”, ka thënë Stano.
Lidhur me këtë, i pyetur nga një gazetar se çfarë do të ndodhë nëse Prishtina e hap një urë ndërmjet Mitrovicës së Jugut dhe asaj të Veriut, ai tha kjo se duhet të jetë temë e dialogut.
“Rihapja e urës në Ibër është temë e dialogut dhe çdo vendim për të duhet të merret përmes dialogut”, ka thënë Stano./Paparaci.com