Një kamion me mallra nga Serbia me targa të Novi Pazarit ka kaluar sot në ora 12:15 në Merdar.
Kamioni është dërguar për kontroll të detajuar në terminal, i shoqëruar nga automjete të policisë dhe doganës.
Vendimin për heqjen e pjesshme të ndalesës për importin e mallrave serbe e ka bërë të ditur dje kryeministri Albin Kurti.
Vendimi për heqjen e ndalesës për import të mallrave serbe vlen vetëm për pikë-kalimin në Merdar. Kusht për heqjen e ndalimit në vendkalimet e tjera është blerja e skanerëve për kontrollin e mallrave.
Qeveria e Kosovës kishte vendosur ndalesë në importin e mallrave serbe në korrikun e vitit 2023, pas arrestimit të tre zyrtarëve policorë të Kosovës nga Ministria e Punëve të Brendshme e Serbisë.