Sekretarja e Përgjithshme e PDK-së, Vlora Çitaku ka njoftuar se është në Hagë për ta vizituar ish-presidentin Hashim Thaçi.
Ajo ka thënë se ishte e prekur thellë nga zhvillimet e fundit gjyqësore kur Thaçit i është ngritur aktakuza e re, kësaj here për pengim të drejtësisë.
“Sot, udhëtova edhe një herë drejt Hagës për të vizituar një burrë që ka mbajtur mbi supe ëndrrat dhe sakrificat e një populli, të një shteti, Presidentin Hashim Thaçi”, ka shkruar Çitaku në Facebook.
“Unë, posaçërisht këtë herë, isha e prekur thellë nga zhvillimet e fundit me procedurën gjyqësore, ndërsa besimi i palëkundur i Presidentit Thaçi në drejtësinë e luftës çlirimtare të Kosovës shkëlqente më fort se kurrë, edhe brenda këtyre mureve”, ka shkruar ajo.
Ajo ka thënë se “një gjë, le të jetë e qartë për të gjithë: Hashim Thaçi mishëron shpirtin e luftës sonë për liri e pavarësi, guximin e atyre që dhanë gjithçka për këtë tokë dhe besimin e patundur se e vërteta gjithmonë triumfon”.
“Sot, si gjithmonë, ai qëndron i fortë, duke mbrojtur nderin dhe dinjitetin e popullit tonë”, ka thënë ajo.
Sipas saj, rruga e Kosovës drejt lirisë nuk ishte kurrë e lehtë, por ishte gjithmonë e drejtë. Asnjë gjykatë nuk mund ta ndryshojë të vërtetën e një lufte të drejtë për liri.
“Ne mbetemi të palëkundur, pranë tyre dhe të përkushtuar për drejtësi. Për Hashimin. Për Kadrinë. Për Çlirimtarët tanë. Për Kosovën”, ka shkruar ajo.