Kreu i Partisë Demokratike, Lulzim Basha këtë të premte deklaroi se ish-kreu i kësaj partie Sali Berisha ka mashtruar demokratët pasi ka përjashtuar veten e tij nga të gjitha vendimmarrjet e partisë edhe pse ai ka qenë pjesë e tyre.
“Sali Berisha është treguar gënjeshtar me ju duke e përjashtuar veten e tij nga vendimmarrjet me të rëndësishme të PD-së gjatë tetë viteve tona në opozitë, në një kohë kur ai ka qene pjese e vendimmarrjes madje edhe duke i paraprirë me deklarata mediatike, dhe me protagonizmin e tij rivalizues me institucionet e zgjedhura te PD”, tha Basha.
Kryedemokrati tha se ka pranuar përgjegjësinë e tij në lidhje me këtë situatë, por ish-kryeministri nuk mund të bëjë sikur ka qenë në një ndonjë ishull prej nga u kthye pas tetë vitesh.
“Sali Berisha ju ka mashtruar keq duke gënjyer, trilluar e shpifur pa hesap kundër meje, pa paraqitur asnjë fakt a provë sado të vogël, e gjithë kjo që të mbledhë pas vetes mbështetës e të bëjë turmën e karshillëkut kundër SHBA dhe të hedhë demokratët kundër njeri tjetrit. Sali Berisha ka shpërdoruar vullnetin e atyre demokratëve që firmosen për thirrjen e një Kuvendi të Jashtëzakonshëm të PD-së, duke mos lejuar kalimin e firmave të tyre në rrugën ligjore që përcakton kushtetuta e Partisë”, tha Basha.
Kreu i demokratëve theksoi se Berisha ka mashtruar anëtarët e partisë dhe opinionin publik me të ashtuquajturin referendum, ku sipas tij, vetë bën listat, vetë numëron dhe vetë shton votues sa të dojë për ta çuar numrin aty ku e ka paracaktuar.
“Fotografia më e qartë dhe më diskredituese e farsës me emrin referendum janë filmimet në njësinë 8 në zemër të Tiranës ku kanë marrë pjesë në votim më pak se 10 përqind e anëtarëve të PD-së, që komunikata e Sali Berishës në mbrëmje i bën 80 përqind. Ky është pseudo-referendumi, ky është mashtrimi më i madh. Me numra të stisur, me kuti të mbushura, Sali Berisha, për hallin e tij, thërret demokratët të pushtojnë dhe asgjësojnë Partinë Demokratike, forumet e saj të ligjshme”, tha Basha. /Top Channel