Dy gra janë arrestuar nga Policia e Kosovës pas një sulmi fizik ndaj një femre tjetër në Podujevë. Ngjarja ka ndodhur të martën rreth orës 17:00 dhe dyshohet se motivi ka qenë një mosmarrëveshje mes palëve.
Sipas raportit policor, viktima ka pësuar lëndime si pasojë e sulmit, ndërsa të dyshuarat, shtetase të Kosovës, janë arrestuar në vendin e ngjarjes.
Me urdhër të prokurorit të shtetit, të dyshuarat janë ndaluar në mbajtje pas intervistimit, ndërsa rasti është duke u trajtuar nga organet e drejtësisë.
Policia ka bërë të ditur se po vazhdon hetimet për zbardhjen e plotë të rrethanave të këtij incidenti.