Arianit Koci e ka zhvendosur në rrjetin social Facebook agjendën e tij të arritjes së një koncensusi politik për zgjidhjen e ngërçit institucional.
Të enjten, avokati nga Prishtina i është lutur ministrit në detyrë të Financave, Hekuran Muratit, që Vetëvendosje të ndërrojë kandidatin për kryetar të Kuvendit të Kosovës, pozitë për të cilën partia në pushtet e ka propozuar Albulena Haxhiun.
Lutjet e tij drejtuar ministrit, Koci e ka bërë direkt nën një postim të Muratit në rrjetin social Facebook në të cilin ai i replikoi disa deklarimeve të Hykmete Bajramit të LDK-së.
“Ministër, nuk ka nevojë për ironi. As për lojëra fjalësh! Po krijoni animozitete. Jeni vetëm kundërshtar politik, e jo armiq”, e këshilloi Koci, Muratin.
Avokati, pastaj iu lut atij për unifikim të skenës politike.
“Më shumë se kurrë, kemi nevojë për unitet. Po ju lus: propozoni një kandidat tjetër, dhe procedoni me formimin e Kuvendit”, iu përgjërua Koci, Muratit.
Koci risolli në vëmendje se të premten, Kuvendi do të shkojë drejt seancës së 38-të të dështimit.