Sulmuesi kosovar, Edon Zhegrova ka nisur me një javë vonesë përgatitjet për sezonin e ri me skuadrën franceze, Lille.
Zhegrova njoftoi dje se ka nisur stërvitjet në kampin e Lille, megjithatë prezenca e tij ishte paraparë të vërehej javën e kaluar.
Lille kishte nisur përgatitjet për sezonin e ri të hënën e 23 qershorit, por Zhegrova ishte me pushime në Kosovë.
Sulmuesi kosovar nuk ka dhënë asnjë arsye për mungesën e tij një javore, raportojnë mediat franceze të mërkurën.
Zhegrova kishte munguar që nga dhjetori për shkak të lëndimit, për të cilin u nevojit edhe ndërhyrja kirurgjike dhe pritej që të ishte i pranishëm përpara të tjerëve në përgatitje, por ndodhi e kundërta.
26-vjeçari kosovar duket se nuk është i kënaqur me skuadrën e tij, për çka edhe i ka njoftuar se nuk do ta zgjasë kontratën.
Ai ka kontratë me Lille vetëm edhe këtë sezon.
Zhegrova ishte njëri ndër emrat më të përfolur në merakton e kaluar, e po ashtu edhe në këtë të këtij viti, por duket se sulmuesi anësor do të jetë edhe për këtë vit pjesë e skuadrës franceze.
Me Lillen, Zhegrova ka zhvilluar 107 ndeshje, në të cilat ka shënuar 26 gola dhe ka dhuruar 18 asistime.