Grupi Parlamentar PSG-SDA Sanxhaka-PDD i dorëzoi sot Parlamentit të Republikës së Serbisë propozimin për rezolutë mbi gjenocidin në Srebrenicë, i cili shkaktoi reagime të ashpra nga tabloidët nën kontrollin e regjimit të Aleksandar Vuçiqit.
Konkretisht, grupi parlamentar i minoriteteve në Serbi, i cili përfshin edhe Partinë për Veprim Demokratik të deputetit shqiptar Shaip Kamberi, propozoi që rezoluta të vendoset me procedurë urgjente për nderë 30-vjetorit të gjenocidit kundër popullit boshnjak në korrikun e vitit 1995.
Nënshkruesit e këtij propozimi janë deputetët Pavlle Gërboviq, Shaip Kamberi, Ahmedin Shkriell, Minela Kalendar, Anna Oreg dhe Vladimir Pajiq.
Ata thanë se pranimi i kësaj rezolute do të nënkuptonte një distancim të qartë të Republikës së Serbisë nga politika e mohimit, pandëshkueshmërisë dhe glorifikimit të krimeve dhe kriminelëve.
Aksioni i tyre i shqetësoi veçanërisht disa media në Serbi.
Pra, menjëherë pas kësaj iniciative, në portalin “Informer” – të afërt me Vuçiqin – u botua titulli: “Opozita e bllokuar i paraqiti Parlamentit një propozim për ta shpallur Serbinë gjenocidale!”.
Ngjashëm reagoi edhe “Kurir”, duke e publikuar këtë lajm me titullin “OPOZITA BLLOKUESE PARAQITI NJË PROPOZIM-REZULTATE PËR SREBRENICËN: Ata kërkojnë që kushdo që ‘mohon gjenocidin’ të ndëshkohet!”.
Mediat në Serbi u shqetësuan veçanërisht nga fakti që teksti i këtij propozimi thotë se pranimi do të nënkuptonte që “Asambleja Kombëtare e Republikës së Serbisë shpreh ngushëllimet dhe kërkimfaljet e saj ndaj familjeve të viktimave sepse Republika e Serbisë nuk e parandaloi gjenocidin në Srebrenicë, as nuk i ndëshkoi autorët”.
Ata e cilësuan këtë propozim si “të turpshëm” dhe akuzuan mbështetësit se po mbështesnin “bllokaduesit” në rrugë.
Kjo situatë tregon se trajtimi i gjenocidit në Srebrenicë në Serbi është ende një temë tabu dhe subjekt i manipulimeve të ndryshme. Këto media janë të njohura për publikun për mbështetjen e tyre të madhe ndaj Aleksandar Vuçiqit.