Kapiteni i skuadrës së Larnes, Tomas Cosgrove, ka thënë se të enjten i pret një ndeshje e madhe në Prishtinë, ku do të luajnë kundër fituesit të Kupës së Kosovës.
Prishtina do të jetë nikoqire e Larnes, në ndeshjen e kthimit të raundit të dytë kualifikues të Ligës së Konferencës.
Mbrojtësi i skuadrës irlandeze, Cosgrove ka thënë se bashkëlojtarët e tij “duhet ta mbajnë topin më mirë” në ndeshjen e kthimit.
32-vjeçari irlandez ka thënë se skuadra e tij ka luajtur mirë në ndeshjen e parë, por fatkeqësisht nuk kanë arritur të shënojnë gola.
Sipas tij, gabimet e bërë në ndeshjen e parë do të mundohen t’i përmirësojnë në atë të kthimit, që do të zhvillohet të enjten në Prishtinë.
“Ishte një ndeshje e çuditshme. Ne luajtëm mirë për 65 minuta dhe u zhgënjyem që nuk shënuam disa gola. Përfunduam me rezultatin 0-0 dhe ishim të lumtur për këtë sepse qëndruam vërtet të fortë drejt fundit. Është një ndeshje e madhe të enjten në mbrëmje. Ne e dimë se çfarë bëmë mirë në ndeshje dhe e dimë se çfarë bëmë gabim, kështu që do të përpiqemi ta adresojmë këtë”, tha Cosgrove.
Prishtina barazoi pa gola në ndeshjen e zhvilluar në udhëtim. Të enjten do të zhvillohet ndeshje e kthimit, ndërsa fituesi do të vazhdojë tutje në rrethin e tretë kualifikues.
Fituesi i këtij dueli do të përballet me fituesin midis klubit portugez CD Santa Clara dhe ekipit kroat NK Varazdin.