Kryetari i LDK-së, Lumir Abdixhiku e ka cilësuar si kampion të pathyeshëm të Vitisë, Sokol Halitin që synon mandatin e tij të katërt si kryetar i Vitisë.
Në një tubim të madh, Abdixhiku ka thënë se ishte manifestim i qartë i besimit që Vitia ka për LDK-në.
“Sokol Haliti edhe 4, për të 4-tën! Kampioni i pathyeshëm i Vitisë, 4×4, këtë herë edhe më fuqishëm, që në raundin e parë”, ka thënë Abdixhiku.
“Sonte, në Viti, në mesin e entuziazmit të zjarrtë dhe mbështetjes së flaktë të qytetarëve, prezantuam Sokolin tonë si kandidat dhe listën prej 30 kandidatëve për Asamblenë Komunale”, ka thënë ai.
“Ky ishte manifestim i qartë i besimit që Vitia ka për LDK-në, për vizionin tonë, për zhvillimin dhe për të ardhmen. Sokoli dhe ekipi i tij janë garancia e vazhdimësisë, e punëve të mira të bëra deri më tani dhe e projekteve të mëdha që e presin Vitinë nesër”, ka theksuar ai.
“Me këtë frymë të madhe uniteti e energjie, fitorja është e pashmangshme. Vitia po flet qartë: për Sokolin, për LDK-në, për të ardhmen”.