Kryetari i degës së Aleancës për Ardhmërinë e Kosovës në Prizren, Besnik Krasniqi ka reaguar pas raportimeve për dorëheqjen e Suada Hallaqit.
Sipas Krasniqit, AAK-ja në Prizren nuk ka pasur nënkryetare në degën e saj.
“Aleanca për Ardhmërinë e Kosovës – Dega në Prizren, sqaron opinionin publik se nuk ka dhe as nuk ka pasur ndonjë nënkryetare femër në strukturat e saj”, ka shkruar ai.
Tutje shton se Hallaqi ka qenë kandidate për Kuvendin Komunal të kësaj komune.
“Personi që ka paska dhënë dorëheqje, ka qenë ish-kandidate për Kuvendin Komunal, të cilën e falënderojmë për angazhimin dhe për 24 votat e fituara në zgjedhjet e fundit. Theksojmë se ajo nuk ka ushtruar asnjëherë funksionin e nënkryetares së degës”, shkruan Krasniqi.
Hallaqi dha dorëheqjen duke thënë se vendimi për koalicion nga ana e kryetarit të degës, Besnik Krasniqit, u bë pa pëlqimin dhe vullnetin e anëtarëve të tjerë të AAK-së në këtë komunë.