Raundi i fundit i bisedimeve midis zyrtarëve ukrainas dhe amerikanë në Berlin ka përfunduar, raportojnë mediat ukrainase.
Negociatori kryesor ukrainas me Shtetet e Bashkuara ka thënë se dy ditë diskutimesh në Berlin kanë qenë “konstruktive dhe produktive, me përparim të vërtetë të arritur”.
Rustem Umerov, sekretari i Këshillit Kombëtar të Sigurisë dhe Mbrojtjes të Ukrainës, në një postim në X, falënderoi gjithashtu Presidentin e SHBA-së Trump dhe vlerësoi ekipin amerikan të udhëhequr nga i dërguari special Steve Witkoff dhe Jared Kushner për “punën jashtëzakonisht konstruktive për të ndihmuar Ukrainën të gjejë një rrugë drejt një marrëveshjeje paqeje që zgjat”.
Ndërkohë që është diskutuar se Gjermania do të thellojë angazhimin e saj ndaj mbrojtjes së Ukrainës përmes sipërmarrjeve të përbashkëta, integrimit të tregut dhe garancive të mundshme të investimeve sipas një plani 10-pikësh të zbuluar të hënën gjatë vizitës së Zelenskyy në Berlin.
“Një industri e fortë mbrojtëse ukrainase është thelbësore për mbrojtjen kundër luftës së agresionit të Rusisë dhe është një element i rëndësishëm i garancive të sigurisë për të penguar agresionin e ardhshëm rus”, thuhet në dokument.
Ministritë e mbrojtjes të të dy vendeve do të zhvillojnë konsultime të rregullta në nivel të lartë dhe do të bashkëpunojnë më ngushtë në kërkimet, sipërmarrjet e përbashkëta dhe prokurimet në lidhje me mbrojtjen, me Gjermaninë, mbështetësen më të madhe të Ukrainës në Evropë, që po shqyrton përdorimin e garancive federale të investimeve, sipas një deklarate, shkruan DW.
Berlini dhe Kievi gjithashtu do të marrin masa për të parandaluar korrupsionin, tha dokumenti, duke pranuar shqetësimet rreth skandalit më të madh të korrupsionit në Kiev gjatë luftës që shkaktoi dorëheqjen e dy ministrave dhe shefit të stafit të Zelenskyy.
Plani 10-pikësh kërkon:
- Konsultime të rregullta të nivelit të lartë midis ministrive të mbrojtjes mbi politikën e armatimit
- Një zyrë ndërlidhëse në Berlin për industrinë ukrainase të armëve, të quajtur Shtëpia e Lirisë së Ukrainës, për të siguruar një rrjet më të mirë midis prodhuesve të armëve të të dy vendeve
- Forcimin e stafit të atasheut ushtarak në Ambasadën Gjermane në Kiev
- Ukraina do të ndërtojë dronë luftarakë të zhvilluar brenda vendit në Gjermani
- Zgjerimin e zhvillimit dhe prodhimit të përbashkët të pajisjeve mbrojtëse në fusha të tjera
- Intensifikimin e prokurimit të përbashkët të pajisjeve mbrojtëse për Ukrainën nga vendet partnere evropiane
- Integrimin më të ngushtë të Ukrainës në tregun mbarëBE për pajisjet mbrojtëse
- Qeveria gjermane do të shqyrtojë përdorimin e garancive të investimeve për të promovuar përfshirjen e kompanive gjermane të armëve në Ukrainë
- Gjermania dëshiron të përdorë të dhënat dixhitale të fushëbetejës së Ukrainës dhe njohuritë mbi përdorimin e armëve gjermane në betejën mbrojtëse kundër Rusisë për të përmirësuar trajnimin e ushtarëve dhe zhvillimin e strategjive
- Të dyja palët të marrin masa paraprake për të parandaluar korrupsionin në prokurimin e pajisjeve ushtarake.