Bedri Hamza beson se rezultati i zgjedhjeve të jashtëzakonshme nuk është i duhuri për Partinë Demokratike të Kosovës, edhe pse partia arriti të ruajë votën e vet nga zgjedhjet e para dhjetë muajve.
Në një konferencë për shtyp të hënën, kryetari i PDK-së tha se ka pritur rezultat më të mirë në zgjedhje dhe ka shprehur gatishmëri të marrë përgjegjësitë që i takojnë.
“PDK ka pritur rezultat më të mirë; unë kam pritur rezultat më të mirë, por PDK ka arritur të ruajë votën e vet. Pozita i ka përgjegjësitë e veta dhe unë nuk jam prej atyre që fshihem nga përgjegjësitë. Këto ditë do të kemi takime me strukturat e PDK-së, vendimet i marrë në kohë, të analizuara dhe të peshuara mirë”, u shpreh Hamza.
Partia Demokratike e Kosovës pritet t’i nënshtrohet një reforme të gjerë, paralajmëroi Hamza në konferencën për shtyp nga selia qendrore e partisë të hënën.
“Unë po deklaroj sot që Partia Demokratike e Kosovës, shpejt do të futet në një proces të brendshëm zgjedhor – nuk ka pasur për një kohë të gjatë zgjedhje, prej vitit 2019 – dhe do të fillojë prej bazës, prej nëndegëve, duke i përfshi të gjitha nivelet deri në zgjedhjen e të gjitha organeve të partisë sepse realisht është kohë e gjatë dhe kemi nevojë të kemi një ndryshim edhe të moshës, edhe të gjinive, edhe shumëçka tjetër”
Hamza tha se PDK do të bashkëpunojë me shumicën për votimin e marrëveshjeve ndërkombëtare në Kuvendin e Kosovës.
“Gjithçka që është në interes dhe në dobi të Kosovës, PDK do të japë kontributin e vet. Sa i përket marrëveshjeve ndërkombëtare, edhe në të kaluarën i kemi votuar marrëveshjet ndërkombëtare”, tha Hamza.
Në fund, lideri i ri i PDK-së u shpreh optimist për gjetjen e një gjuhë të bashkëpunimit mes spektrit politik për zgjedhjen e presidentit të ri në pranverën e 2026-s. /Paparaci.com