Qeveria e Maltës dhe OpenAI kanë nënshkruar një marrëveshje historike që do t’u mundësojë qytetarëve të vendit të kenë akses falas në ChatGPT Plus për një vit.
Bëhet fjalë për partneritetin e parë të këtij lloji mes OpenAI dhe një qeverie kombëtare, në kuadër të një programi shtetëror për edukimin në inteligjencën artificiale.
Sipas mediave të huaja, qytetarët dhe banorët e regjistruar në sistemin online të identitetit të Maltës do të mund të aplikojnë për abonimin falas pasi të përfundojnë kursin online “AI for All”, i zhvilluar nga University of Malta.
Kursi synon t’i ndihmojë qytetarët të kuptojnë bazat e inteligjencës artificiale, mënyrën se si funksionon ajo, çfarë mund dhe nuk mund të bëjë, si dhe përdorimin e saj të përgjegjshëm në jetën e përditshme dhe në punë.
Autoriteti i Inovacionit Digjital të Maltës ka bërë të ditur se faza e parë e programit do të nisë gjatë muajit maj, ndërsa programi do të zgjerohet gradualisht me rritjen e numrit të pjesëmarrësve që përfundojnë kursin.
Ministri i ekonomisë dhe projekteve strategjike të Maltës, Silvio Schembri, deklaroi se kombinimi i edukimit me aksesin falas në mjetet më të avancuara digjitale do t’i ndihmojë qytetarët, studentët dhe punëtorët të përfitojnë drejtpërdrejt nga teknologjia.
Ndërkohë, George Osborne, drejtues i iniciativës së OpenAI për vendet, tha se Malta po tregon se si shtetet mund t’u mundësojnë qytetarëve të përfitojnë nga potenciali transformues i inteligjencës artificiale.