Meta, kompania që zotëron Facebook-un, Instagram-in dhe WhatsApp-in, ka ndaluar një program që mbikëqyrte aktivitetin kompjuterik të punonjësve. Ky vendim vjen pas shqetësimeve për privatësinë dhe reagimit të stafit ndaj një mjeti të quajtur “Model Capability Initiative”, i cili regjistronte shtypjet në tastierë, klikimet e miut dhe përmbajtjen e ekraneve për të mbledhur të dhëna për trajnimin e modeleve të inteligjencës artificiale.
Më shumë se 1,600 punonjës të Meta-s nënshkruan një peticion kundër këtij mjeti, duke kërkuar që kompania të mos mbledhë të dhëna mbi përdorimin e kompjuterit nga stafi. Në peticion thuhet se mbledhja dhe ripërdorimi i këtyre të dhënave ngre shqetësime serioze për privatësinë, pëlqimin dhe besimin në vendin e punës. Publikimi Wired raportoi se të dhënat e mbledhura nga laptopët e korporatës ishin të aksesueshme për këdo brenda kompanisë, duke përfshirë biseda private dhe të dhëna të performancës.
Meta konfirmoi se programi është ndalur përkohësisht. Në një deklaratë, kompania u shpreh se programi ishte projektuar me masa mbrojtëse për privatësinë dhe se nuk ka indikacione që të dhënat janë aksesuar në mënyrë të pahijshme nga punonjësit, por se po kryhet një hetim. Mark Zuckerberg, themeluesi dhe shefi ekzekutiv i Meta-s, kishte deklaruar më herët se modelet e inteligjencës artificiale mësojnë nga vëzhgimi i punës së inxhinierëve të kompanisë.
Përveç kësaj, The New York Times raportoi se Zuckerberg ka urdhëruar një ekip të vogël të krijojë një aplikacion të quajtur “Arena”, i cili do të funksiononte si një treg parashikimesh për ngjarje të ndryshme, ngjashëm me platformat Polymarket dhe Kalshi. Projekti mbetet në fazën e zhvillimit dhe mund të mos publikohet. Mike Proulx, drejtor kërkimor në kompaninë Forrester, vlerësoi se hyrja në këtë fushë mund të jetë problematike për një kompani që përballet tashmë me presion ligjor për produktet e saj sociale.