Operatori i sistemit energjetik të Britanisë së Madhe (Neso) ka ngritur alarmin për furnizimin me energji elektrike për herë të dytë këtë javë, ndërsa vala e të nxehtit vazhdon të ndikojë në tregjet energjetike të Evropës. Neso lëshoi një njoftim të enjten vonë, duke u kërkuar prodhuesve të sigurojnë çdo sasi shtesë të energjisë për mbrëmjen e së premtes, për të përballuar kërkesën në rritje ndërsa qytetarët përdorin klimatizatorë dhe ventilatorë.
Deri të premten pasdite, operatori arriti një marrëveshje për të paguar 200 £ për megavat-orë për të importuar energji nga kontinenti, sasi e mjaftueshme për të furnizuar rreth 3 milionë shtëpi tipike britanike. Ky çmim është pothuajse tri herë më i lartë se çmimi mesatar i energjisë në qershor të vitit të kaluar. Operatori deklaroi se kjo masë u ndërmor për shkak të “marginave të ngushta në sistemin elektrik” si pasojë e temperaturave ekstreme.
Megjithatë, organi shtetëror theksoi se furnizimi me energji elektrike nuk është në rrezik dhe se nuk pritet ndonjë ndërprerje e menjëhershme. Ky paralajmërim pason një thirrje të ngjashme të bërë të martën, përpara rritjes së kërkesës të mërkurën në mbrëmje, kur temperaturat e larta ndikuan në ngadalësimin e shpejtësisë së erës, duke prekur prodhimin nga burimet e ripërtëritshme.
Operatori është detyruar të paguajë shuma mbi çmimin e zakonshëm të tregut për prodhuesit që mundën të rrisin kapacitetet, kosto e cila do të mbulohet përmes faturave të energjisë së familjeve. Për mbrëmjen e së mërkurës, vlerësohet të jenë paguar rreth 10 milionë £, kryesisht për termocentralet me gaz. Ndërkohë, disa impiante me gaz në Britani kanë reduktuar prodhimin, ndërsa në Francë katër centrale bërthamore raportuan ndërprerje për shkak se temperaturat e lumenjve ishin shumë të larta për ftohjen e reaktorëve.
Vala e të nxehtit pritet të zhvendoset drejt lindjes nga fundjava. Republika Çeke dhe Hungaria kanë lëshuar alarme të kuqe për temperatura deri në 40°C. Qeveria hungareze u ka kërkuar familjeve të kufizojnë përdorimin e klimatizatorëve midis orës 18:00 dhe 21:00, si dhe të ngarkojnë pajisjet elektronike dhe automjetet elektrike më vonë gjatë mbrëmjes.
Burimi: theguardian.com