Shumë zona të Venezuelës, të shkatërruara nga dy tërmetet e javës së kaluar, ende nuk kanë marrë ndihmë të konsiderueshme nga qeveria, duke i lënë banorët që të organizojnë vetë pjesën më të madhe të përpjekjeve për shpëtim. Në portin e La Guaira, një nga qytetet më të goditura, banorët janë parë duke përdorur levë, çekiçë dhe kazma për të nxjerrë të afërmit dhe fqinjët nga rrënojat.
Të hënën, një pasgoditje me magnitudë 4,6 shkaktoi ankth te banorët në La Guaira dhe në kryeqytetin Caracas, megjithëse nuk u raportuan dëme të reja. Më shumë se 1.700 persona kanë humbur jetën nga tërmetet me magnitudë 7,2 dhe 7,5 që goditën shtetin verior të La Guaira-s të mërkurën. Sipas koordinatorit humanitar të OKB-së, Gianluca Rampolla Del Tindaro, janë regjistruar mbi 500 pasgoditje dhe të paktën 2.500 struktura janë prekur, shumica e të cilave janë shembur plotësisht.
Ruben Rojas, një elektricist 32-vjeçar, tha se ekipet e mbrojtjes civile nuk kanë pajisjet e nevojshme për të ndërhyrë. Ndërkohë, Carolyn Zerpa, 39 vjeçe, e cila po kërkonte babanë dhe vëllain e saj, deklaroi se mundësitë për të gërmuar me mjete dore janë të kufizuara. Zuly Marín, banore e La Guaira-s, shprehu pakënaqësi për reagimin e ngadaltë të autoriteteve, duke vlerësuar se situata ekonomike e vendit ka ndikuar në vonesat e ndihmës.
Presidentja e përkohshme, Delcy Rodríguez, njoftoi se mbi 25.000 punonjës emergjence, policë dhe ushtarë janë angazhuar në terren. Ajo gjithashtu bëri të ditur krijimin e një komisioni për vlerësimin e dëmeve, të kryesuar nga vëllai i saj, Jorge Rodríguez. Ndërkohë, një 21-vjeçar u nxor i gjallë nga rrënojat në Caraballeda pas më shumë se 100 orësh, falë ekipeve të shpëtimit nga Venezuela, Meksika dhe El Salvadori.
Ndihma ndërkombëtare vazhdon të mobilizohet. Shtetet e Bashkuara kanë njoftuar një ndihmë prej 300 milionë dollarësh për të ofruar kujdes mjekësor, ushqim dhe strehim. Një fregatë amerikane, USS Fort Lauderdale, është pozicionuar pranë bregdetit të La Guaira-s për të ndihmuar në shpërndarjen e ndihmave, ndërsa Kina dhe Holanda gjithashtu kanë premtuar mbështetje.
Burimi: bbc.co.uk