Policia në Monako dhe në Francën fqinje është vënë në kërkim të një personi të dyshuar për shpërthimin e një mjeti shpërthyes të improvizuar në qendër të principatit. Nga ky incident mbetën të plagosur tre persona, përfshirë një adoleshent, në një ndërtesë banimi.
Shpërthimi ndodhi rreth orës 21:00 të së hënës. Sipas autoriteteve, një çift i moshës 50 deri në 60 vjeç pësoi lëndime të rënda, ndërsa një 13-vjeçar, i cili me gjasë është i afërm i çiftit, pësoi lëndime më të lehta. Një burim i afërt me hetimet konfirmoi për agjencinë AFP se mes të plagosurve është edhe oligarku ukrainas, Vadym Yermolaiev.
Ministri i Shtetit i Monakos, Christophe Mirmand, e përshkroi ngjarjen si një “shpërthim të qëllimshëm”. Ai bëri të ditur se mjeti shpërthyes përmbante bulona dhe saçme. Mirmand deklaroi se, sipas njohurive të tij, ky është rasti i parë në historinë e principatit që ndodh një akt i tillë.
Prokurori publik i Monakos, Stephane Thibault, njoftoi se i dyshuari la një çantë ose paketë në hollin e ndërtesës përpara se të largohej. Gazeta franceze Le Figaro raportoi se pamjet e sigurisë shfaqin një burrë duke lënë një çantë shpine në hyrje të ndërtesës pak para shpërthimit.
Princi Albert II i Monakos e cilësoi incidentin si një “krim të shëmtuar” dhe një tronditje për komunitetin. Ndërkohë, një ndihmës i ministrit të Brendshëm francez, Laurent Nunez, deklaroi se policia po punon për gjetjen e autorit që është larguar nga vendngjarja.
Në zonën ku ndodhi shpërthimi është vendosur një prani e shtuar e forcave të rendit, ndërsa zona është rrethuar. Një helikopter është parë duke fluturuar mbi vendin e ngjarjes gjatë operacionit policor.
Burimi: aljazeera.com