Një raport i ri nga Ramp dhe Revelio Labs, të cilët monitorojnë shpenzimet për inteligjencën artificiale (AI) dhe të dhënat e fuqisë punëtore në gati 22,000 kompani, ofron një këndvështrim të ri mbi ndikimin e AI-së në tregun e punës. Sipas gjetjeve, kompanitë që investojnë intensivisht në këtë teknologji po rrisin numrin e punonjësve më shpejt se të tjerat.
Raporti identifikon si “adoptues me intensitet të lartë” ato firma që shpenzojnë mesatarisht 30 dollarë për punonjës në muaj për AI gjatë tre muajve të parë. Këto kompani shënuan një rritje të stafit prej 10.2%. Rritja është vërejtur në funksione të ndryshme, duke përfshirë inxhinierinë, shitjet, administratën, shërbimin ndaj klientit, financat, marketingun dhe rolet shkencore.
Sektori i informacionit, i cili përfshin firmat e softuerit, internetit dhe mediave, ka shënuar rritjen më të fortë të vendeve të punës mes këtyre adoptuesve. Megjithatë, autorët vërejnë se të dhënat anojnë nga firmat teknologjike që shpesh mbështeten nga kapitali i riskut dhe janë në fazë zgjerimi, duke e bërë të vështirë përcaktimin nëse AI është shkaktari i drejtpërdrejtë i punësimeve apo thjesht një element i pranishëm në kompani që po rriten gjithsesi.
Autorët e raportit pranojnë se dokumenti nuk dëshmon se AI krijon vende pune në mënyrë universale, por kundërshton pretendimet se teknologjia do të çojë në humbje të përgjithshme të vendeve të punës. Kjo bie ndesh me hulumtimet e Goldman Sachs, të cilat sugjeruan se AI ka eliminuar rreth 16,000 vende pune neto në muaj gjatë vitit të kaluar, duke prekur veçanërisht punonjësit e rinj. Megjithatë, në firmat teknologjike, numri i punonjësve në nivele hyrëse u rrit me 12%.
Raporti sugjeron se AI mund të shërbejë si mjet për zgjerimin e firmave duke ulur kostot e prodhimit. Megjithatë, kompanitë që vetëm eksperimentojnë me abonime pa bërë investime të qëndrueshme nuk shfaqin rritje të stafit. Autorët paralajmërojnë se mund të krijohet një hendek midis firmave që kanë burime për të përfituar nga AI dhe atyre që mbeten prapa.
Burimi: techcrunch.com