Në orët e hershme të së hënës, raketat balistike ruse goditën disa ndërtesa në Kijev, duke lënë të paktën nëntë persona të vdekur. Shërbimet e emergjencës janë duke punuar për të nxjerrë të mbijetuarit nga rrënojat e blloqeve të banesave të dëmtuara pjesërisht.
Kryebashkiaku i qytetit, Vitali Klitschko, deklaroi se raketat goditën ndërtesa të ndryshme, duke shkaktuar zjarre në komplekse banesore, si dhe dëme në depo dhe një punëtori garazhi.
Sulmet ndodhën një ditë para samitit të NATO-s në Turqi, ku presidenti ukrainas, Volodymyr Zelensky, pritet të zhvillojë bisedime me presidentin amerikan, Donald Trump. Disa orë para këtyre sulmeve, Zelensky kishte paralajmëruar se inteligjenca tregonte për një valë të dytë të sulmeve ruse brenda një jave, pas një sulmi të mëparshëm të enjten që la 30 të vdekur.
Zelensky u ka bërë thirrje aleatëve që të mos vonojnë furnizimet me raketa me rreze të gjatë veprimi. Përmes një postimi në platformën X, ai theksoi se çdo vonesë me raketat për mbrojtjen ajrore nënkupton humbje jetësh dhe inkurajon Rusinë të vazhdojë luftën.
Ukraina ka akuzuar Moskën për sulme të qëllimshme ndaj zonave civile. Nga ana tjetër, Rusia ka deklaruar se ka shënjestruar baza ushtarake dhe energjetike si hakmarrje për sulmet e fundit ukrainase ndaj objekteve energjetike në territorin rus. Ndërkohë, pamjet nga Kijevi shfaqin rrënoja dhe automjete të djegura, ndërsa ekipet e shpëtimit vazhdojnë kërkimet për të mbijetuarit.
Burimi: bbc.co.uk