Eduard Dervishaj është prej vitesh pjesë e federatës së Spanjë duke mbajtur role të rëndësishme deri te zëvendës sekretar i përgjithshëm.
Dervishaj, i lindur dhe rritur në Tiranë, jeton në Spanjë nga viti 1997. Aktualisht drejtor i departamentit ndërkombëtar dhe operacioneve në Federatën Spanjolle të Futbollit, ai ka shërbyer si shef i organizimit të katër finaleve të Ligës së Kampionëve.
Jo rastësisht, 65-vjeçari është caktuar njeriu përgjegjës për organizimin e Kupës së Botës 2030, që zhvillohet në Spanjë, Portugali dhe Marok. Këtë rol e mori vitin e kaluar.
Këtë vit, ish-trajneri i Dinamos së Tiranës, ka qenë pjesë e ekipit kombëtar të Spanjës që zhvilloi turne të jashtëzakonshëm në Amerikën e Veriut dhe në fund u shpall kampion bote.
Përmes një postimi në rrjetet sociale, Dervishaj ka postuar foto me Kupën dhe trajnerin Luis de la Fuente teksa i ka falënderuar të gjithë për rrugëtimin e jashtëzakonshëm dhe që ka përjetuar nga afër Botërorin e tij të dytë.
Rikujtojmë që më parë ai ka qenë edhe sekretar i përgjithshëm i Federatës Shqiptare të Futbollit nga viti 1992 deri më 1996.
Postimi i plotë:
Kupa e Botës po udhëton për në Spanjë
Po fluturojmë mbi Atlantik. U nisëm nga New York-u rreth orës 02:00 dhe, në këtë çast, futbollistët tanë po pushojnë. Ky grup djemsh të jashtëzakonshëm, profesionistë të nivelit më të lartë që na dhuruan një gëzim të papërshkrueshëm, më në fund po çlodhen pas një rrugëtimi 45-ditor mes Shteteve të Bashkuara, Meksikës dhe Kanadasë. Tani po kthehemi drejt Madridit me Kupën e Botës në bord.
Trofeu më i rëndësishëm i futbollit botëror dhe një nga simbolet më të mëdha të sportit. Fitimi i saj nuk është vetëm kurora e një turneu të jashtëzakonshëm; është shpërblimi i një rruge të gjatë pune, vizioni, tradite, kulture futbollistike dhe ekselence që futbolli spanjoll e ka ndërtuar me mund, me pasion dhe me dinjitet brez pas brezi.
Ndihem krenar që i përkas dhe që prej 30 vitesh jap kontributin tim për Federatën Mbretërore Spanjolle të Futbollit.
Mirënjohje e pafund për këta djem të mrekullueshëm që më dhanë mundësinë të përjetoj nga afër Kupën time të dytë të Botës.