Shpërthimi i Ebolës i shkaktuar nga virusi Bundibugyo në Republikën Demokratike të Kongos vijon të përhapet, me 2,423 raste të konfirmuara, 967 viktima dhe 469 persona të shëruar, bëri të ditur Organizata Botërore e Shëndetësisë (OBSH).
Menaxheri i incidenteve të OBSH-së për reagimin ndaj virusit Bundibugyo, Thierno Balde, deklaroi në Gjenevë se shpërthimi tashmë është shtrirë në pesë provinca të vendit. Provinca Ituri mbetet epiqendra e krizës, duke përbërë 89.1% të rasteve dhe 83.9% të viktimave.
Sipas Balde, autoritetet shëndetësore kanë një kuptim më të qartë të mënyrës së përhapjes së virusit dhe po përshtatin masat e reagimit. Ai theksoi se shpërthimi vijon të jetë aktiv dhe se përpjekjet janë përqendruar në frenimin e transmetimit.
OBSH ka identifikuar tre modele të përhapjes së virusit: transmetim intensiv në Bunia dhe zonat përreth, shpërthime në zhvillim në Kisangani, Haut-Uele, Katwa dhe Butembo, si dhe shenja stabilizimi në Mongbwalu, ku u identifikuan rastet e para, dhe në Goma.
Sipas OBSH-së, ekipet e reagimit të shpejtë në Kisangani kanë parandaluar deri tani transmetimin lokal të virusit, pasi të pesë rastet e regjistruara në këtë zonë janë importuar nga Ituri. Organizata njoftoi se masa të ngjashme do të zbatohen edhe në zonat e tjera të prekura, ndërsa prioritet mbeten varrimet e sigurta, sistemet e referimit të pacientëve dhe forcimi i kapaciteteve të trajtimit në vatrat më aktive të shpërthimit.