Sipas të dhënave të Eurostat për vitin 2023, të përpunuara nga “Monitor”, baret, restorantet dhe shërbimet ushqimore përbëjnë 12.28% të numrit të përgjithshëm të ndërmarrjeve në Shqipëri. Kjo shifër është më e larta ndër vendet europiane të krahasuara dhe rreth 2.6 herë mbi mesataren e Bashkimit Europian prej 4.73%.
Diferenca me vendet e tjera është e ndjeshme. Pas Shqipërisë renditet Serbia, ku aktivitetet e shërbimit të ushqimit dhe pijeve përbëjnë 8.43% të ndërmarrjeve, e ndjekur nga Greqia me 8.25%, Spanja me 7.51%, Kroacia me 7.28% dhe Turqia me 7.05%. Në Maqedoninë e Veriut, ky sektor zë 6.57% të bizneseve, ndërsa në fund të renditjes gjenden vende si Lituania me 1.19% dhe Estonia me 1.97%.
Duke pasur parasysh se numri i përgjithshëm i ndërmarrjeve në vend është 125,737, më shumë se një në çdo tetë biznese operon në këtë sektor. Nëse përfshihen edhe 2,517 ndërmarrjet e akomodimit, numri i përgjithshëm arrin në 17,962, ose 14.3% të totalit, shifër kjo më e larta në Europë.
Në raport me popullsinë, Shqipëria renditet e treta në Europë, me 6.63 bare dhe restorante për çdo 1,000 banorë. Mesatarja e Bashkimit Europian është 3.5 ndërmarrje për 1,000 banorë, çka tregon se Shqipëria ka pothuajse dyfishin e kësaj mesatareje.
Dominimi i këtij sektori lidhet me kapitalin relativisht të ulët fillestar dhe kulturën e socializimit. Vitet e fundit, kërkesa është nxitur edhe nga rritja e turizmit, megjithëse efekti mbetet i pabarabartë gjatë vitit. Shumica e këtyre bizneseve janë të vogla dhe familjare, duke u përballur me sfida si rritja e kostove të operimit dhe mungesa e fuqisë punëtore.
Burimi: monitor.al