Nysret Haziri nuk do harrojë kurrë të shtunën e 23 tetorit.
Ajo që ishte planifikuar si një ditë e zakonshme udhëtimi për përfaqësuesin e Kosovës në bouling, u kthye në një nga ditët më të tmerrshme të jetës së tij.
Bashkë me vajzën e tij, Kaulën, 12-vjeçe, ishin nisur drejt Greqisë për të marrë pjesë në Kampionatin Evropian.
Por, babë e bij u mbajtën për shtatë orë në një qendër ndalimi në Aeroportin e Athinës. Vendimin e morën autoritetet greke, bazuar në një arsye absurde: përbënin kërcënim për Greqinë.
Nysreti, në një reagim në Facebook të dielën, rrëfeu tmerrin e Athinës.
“Unë dhe Kuala po udhëtonim për në Chania, për ECC me ekipin e Kosovës dhe përfunduam në burg, në Athinë, me arsyen se jemi kërcënim kombëtar për Greqinë, para 2 orësh dolëm nga burgu dhe po kthehemi në shtëpi me forcë nga policia e Athinës. Kështu që, kjo ishte një pritje fantastike nga ana e këtij shteti”, shkruan në postim Haziri.
Haziri pretendon se e di kush qëndron prapa ndalimit të tij dhe vajzës së tij në “burgun” e Aeroportit të Athinës. Thotë se skenaristi i ngjarjes është një biznesmen, të cilit nuk ia përmend emrin.
“Ne e dimë saktësisht se kush qëndron pas gjithë këtij KONSPIRACIONI. Njeriu që pretendon se është një biznisman dhe se e do sportin, por ai është njeri i ligë dhe më kryesorja është se ai më njeh mua dhe unë e njoh atë shumë mirë, kështuqë shpresoj ta shohë së shpejti ballë për ballë!!!”, vijoi Haziri.
Përfaqësuesi i Kosovës në bouling, po ashtu nuk ka lënë pa treguar edhe se si janë trajtuar ata në të ashtuquajturin burg të Aeroportit.
“Ishte përvojë shumë e keqe për mua dhe posacërisht për vajzën time, e cila është vetëm 12 vjece, që qëndroi pa ushqim dhe pa ujë nga ora 11:40 kur na ndaluan në aeroport deri në orën 18:00 kur na dërguan në burg dhe atje u trajtuam si kriminel”, tha ai
Haziri, shpreh keqardhjen e tij kundrejt kësaj që u ndodhi atij dhe të bijës në Grqi.
“Unë nuk ndihem fajtor për këtë sepse unë nuk e zgjodha që Kupa Europiane e Kampionve të mbahet në shtetin e Greqisë, por më vjen shumë keq për veten time, vecanërisht për vajzën time që zgjodhëm të shkojme atje”, përfundoi ai.
