Trajneri i njohur i futbollit Afrim Tovërlani është liruar nga ndalimi policor sot pasdite.
Tovërlani është arrestuar dy ditë më parë nën dyshimin se ka kanosur kryetarin e Prishtinës Shpend Ahmeti dhe të njëjtit më pas iu caktua masa e ndalimit policor prej 48 orësh.
Klan Kosova raportoi një ditë më parë se Tovërlani kishte shkuar te shtëpia e Ahmetit në gjendje të dehur dhe me vete kishte edhe një thikë, derisa vetë ai kishte thirrur edhe policinë të cilët edhe e kishin arrestuar.
Trajneri Tovërlani pas lirimit nuk ka dashur ta komentojë për Klan Kosovën gjithë këtë situatë të krijuar.
Por, një gjë të tillë e ka bërë mbrëmë kryetari i Prishtinës Shpend Ahmeti.
Ai tha se nuk ka pasë kurfarë ballafaqimi fizik dhe as luftë më thika, derisa shtoi se nuk ndihet as i kërcënuar dhe as i rrezikuar nga Tovërlani.
“Ka qenë mbrëmë të shtëpia kur nuk kam qenë unë dhe e ka thirr vetë policinë e cila me të arritur e ka arrestuar. Nuk ndihem as i kërcënuar e as i rrezikuar nga Afrimi edhe pse vizitat e vona në shtëpi kur nuk jam prezent dhe me fëmijë të mitur prezent nuk janë të mirëseardhura. Mirëpo, nuk ka pas as fjalosje e as ndonjë fjalë të rëndë me fëmijët dhe familjen”, kishte shkruar ai në Facebook.