Pronari rus i klubit anglez Chelsea, Roman Abramoviç rezulton se me një nga kompanitë ku ka aksione, po ndihmon në përgatitjen e armëve me të cilat po zhvillohet lufta mes Rusisë dhe Ukrainës.
Abramoviçit, i’u ndalua hyrja dhe jetesa në Britani të Madhe si pasojë e sanksioneve ndaj Rusisë dhe njerëzve të lidhur me Putinin.
Miliarderi rus është aksionar në kompaninë ruse të prodhimeve të çelikut, “EVRAZ”. Pjesë e materialeve që ajo ka prodhuar janë edhe veshjet e blinduara të tankeve të cilat kanë kaluar kufirin dhe aktualisht po bombardojnë territorin ukrainas duke shkaktuar mijëra të vrarë e të plagosur.
Sipas “Daily Mail”. Abramoviç duket se ishte në dijeni të pushtimit, pasi vetëm 8 ditë para se Vladimir Putin të jepte urdhrin për nisjen e luftës me Ukrainën, ai i ka transferuar vetes të gjithë aksionet që zotëronte në “EVRAZ” nëpërmjet kompanive të tjera.