Deputeti i Lëvizjen Vetëvendosje, Adnan Rrustemi, ka sulmuar kreun e SBAShK-ut e të FFK-së, Rrahman Jashari, respektivisht Agim Ademi, si dhe kryeprokurorin Blerim Isufaj.
Rrustemi, në një postim në Facebook, tha se këta persona që ushtrojnë funksionet e tyre, tregojnë se ende është i kapur shteti i Kosovës.
“Pardje Rrahman Jashari në arsim dhe sot Blerim Isufaj në kryeprokurori e Agim Ademi në futboll tregojnë që ende është i kapur përbrenda shteti i Kosovës. Akoma kemi shumë punë që ndryshimi i madh popullor i 14 shkurtit 2021 të bëhet edhe demokratizim i shtetit tonë”, shkroi ai.
Këshilli Prokurorial i Kosovës, sot votoi unanimisht për Blerim Isufajn për Kryeprokuror të ri të Shtetit, i cili është propozuar për dekretim tek presidentja.
Megjithatë, disa organizata të shoqërisë civile kanë rekomanduar të anulohet procesi i përzgjedhjes së Kryeprokurorit të Shtetit dhe të shpallet konkurs i ri. Madje, tri prej tyre po kërkojnë nga Vjosa Osmani, që mos ta dekretojë Isufajn për kryeprokuror të Shtetit.
Ende nuk dihet nëse një gjë e tillë do të ndodhë, ndonëse ekzistojnë përpjekje të ndryshme, si kjo e deputetit Rrustemi, që Isufaj mos të zgjedhet kryeprokuror i Shtetit.