Një gjykatë në Moskë ka urdhëruar arrestimin – në mungesë – të Alexander Nevzorov.
Nevzorov, një gazetar i shquar rus, akuzohet për përhapjen e informacionit të rremë në lidhje me atë që Moska e quan “operacioni i saj special ushtarak” në Ukrainë, raporton Sky News, transmeton Paparaci.
Nevzorov është vendosur në listën e kërkimeve ndërkombëtare të Rusisë dhe do të mbahet në paraburgim për dy muaj nëse kthehet ndonjëherë në Rusi ose ekstradohet atje, shtoi gjykata.
Në mars, gruaja e Nevzorov tha në Instagram se ajo dhe bashkëshorti i saj ishin në Izrael, por nuk kishin plane të zhvendoseshin atje përgjithmonë.
Në të njëjtin muaj, hetuesit hapën një rast kundër Nevzorov për postimin në mediat sociale se forcat e armatosura të Rusisë bombarduan qëllimisht një maternitet në Mariupol.
Nevzorov, i cili ka më shumë se 1.8 milionë abonentë në kanalin e tij në YouTube, e quajti hetimin kundër tij qesharak dhe i shkroi një letër të hapur hetuesit kryesor të Rusisë duke i bërë thirrje që të mbyllte çështjen.
Ukraina dhe aleatët perëndimorë e dënuan sulmin ndaj spitalit si një mizori.
Rusia mohoi kryerjen e bombardimeve, duke akuzuar Kievin për një “provokim të organizuar”.
Tetë ditë pas pushtimit të Ukrainës më 24 shkurt, Rusia miratoi një ligj që jep dënime me burg deri në 15 vjet për ata që janë dënuar për përhapjen e qëllimshme të lajmeve “të rreme” për ushtrinë ruse.