Qeveria e Hungarisë ka shpallur gjendje të jashtëzakonshme për shkak të luftës në Ukrainë, e cila do të hyjë në fuqi nga nesër.
Kryeministri hungarez, Viktor Orban, e bëri njoftimin në një video në Facebook, duke thënë se kabineti i tij duhej të ishte në gjendje që sfidave t’u përgjigjej shpejt.
Ndryshimi do të thotë se ai do të jetë në gjendje të qeverisë me dekret.
Orban, i cili u rizgjodh për një mandat të katërt radhazi në prill, ka përdorur rendin e posaçëm ligjor më parë, një herë për shkak të migrimit dhe përsëri gjatë pandemisë së koronavirusit.
Ai është akuzuar më parë se ka përfituar nga krizat për të çuar më tej ambiciet autoritare dhe për të minuar rëndësinë demokratike të kontrolleve.