Kombëtarja e Holandës nuk do të bartë shiritin që përfaqëson kampanjën “One Love”, pas kërcënimeve nga FIFA.
Holanda dhe dhjetra kombëtare tjera i janë bashkuar kampanjës “One Love”, duke përçuar kështu një mesazh kundër diskriminimeve të të drejtave të njeriut në Katar, ku po mbahet Kupa e Botës.
Kapitenët e skuadrave përkatëse do të bartnin shiritin e kapitenit me ngjyrat e ylberit, mirëpo FIFA kishte kërcënuar me dënime futbollistët dhe ekipet.
Sipas raportimeve, kapitenët e skuadrave do të fillonin ndeshjen me një karton të verdhë në rast se do të bartnin shiritin me ngjyrat e ylberit.
Kombëtarja holandeze ka lajmëruar se kapiteni Virgil van Dijk nuk do të bartë shiritin që simbolizon kampanjën, mirëpo ata akoma kanë të njëjtin mendim lidhur me misionin e “One Love”.
Holanda do të takohet me Senegalin sot në ndeshjen e tyre të parë në kuadër të Kupës së Botës.
Ndeshja mes Holandës dhe Senegalit i takon Grupit A dhe do të zhvillohet me fillim nga ora 17:00.