Futbollisti serb Nemanja Matiq është zemëruar me Greqinë për votimin në Asamblenë Parlamentare të Këshillit të Evropës.
Këshilli i Evropës dy ditë më parë i dha dritën jeshile Kosovës për anëtarësim në këtë organizatë dhe raporti u përpilua nga deputetja greke Dora Bakojanis. Drafti paraprakisht u miratua nga Komiteti për Politikë dhe Demokraci i kësaj organizate.
Pikërisht për këtë, por edhe për faktin se nga pesë deputetë grekë, vetëm një votë ishte kundër pranimit të Kosovës në Këshillin e Evropës, Nemanja Matiq ka dalë në rrjetet sociale dhe ka shprehur zemërimin e tij.
“Hej grekë, ish-vëllezër, ne nuk do t’jua falim këtë”, ka shkruar Matiq në Twitter.
Eeeh grci bivša braćo,ovo vam nećemo oprostiti…
— Nemanja Matic (@NemanjaMatic) April 18, 2024
Matiq ka qenë në qendër të vëmendjes për gjëra të ngjashme më parë, pasi ai refuzoi të vendoste një lulëkuqe për të përkujtuar Ditën e Armëpushimit në Luftën e Parë Botërore.
Ndërsa të gjithë futbollistët e Premierligës angleze mbanin simbolin në xhaketë, Matiq refuzoi.
Ndryshe, ish-lojtari i kombëtares serbe tani është anëtar i klubit francez Lyon, të cilit iu bashkua në janar. Ai bëri karrierë edhe në Manchester United, Chelsea, Benfica, Romë.