Autoritetet ruse e kanë cilësuar “të turpshëm” vendimin e fundit të Asamblesë Parlamentare të Këshillit të Evropës, për të rekomanduar anëtarësimin e Kosovës.
“Vota në favor të Kosovës ishte një siklet për Asamblenë e Këshillit të Evropës, e cila konfirmoi përkushtimin e saj për zhvlerësimin e normave juridike ndërkombëtare dhe shkatërrimin e themeleve të marrëdhënieve ndërmjet shteteve në Evropë”, tha në një deklaratë zëdhënësja e Ministrisë së Jashtme ruse, Maria Zakharova.
Në reagim, Zakharova theksoi se “nuk ka pasur unanimitet” mes deputetëve, “madje edhe ndërmjet delegacioneve të vendeve që në një moment e kanë njohur pavarësinë e Kosovës”, situatë që Moska e konsideron pozitive.
“Kjo tregon se ka ende shtete në kontinent, të afta për t’iu rezistuar mbështetësve të pamenduar të “projektit të Kosovës” dhe linjës së tyre joparimore”, tha ajo.