Kandidati i Lëvizjes Vetëvendosje për kryetar të Podujevës, Shpejtim Bulliqi ka akuzuar Lidhjen Demokratike të Kosovës për manipulim votash në zgjedhjet lokale 2021, teksa sipas tij, LDK ka shpërndarë edhe disa fotografi, kinse ai është me një femër.
Lidhur me këto akuza, kandidati i LDK-së për të parin e Podujevës, Ekrem Hyseni, ka reaguar nëpërmjet një postimi në llogarinë e tij në Facebook.
Hyseni shkroi se në takimet që ai dhe ekipi i tij i kanë mbajtur në Podujevë asnjëherë nuk janë marrë me kandidatët e partive të tjera politike për kryetar të Podujevës.
“Për më tepër, akuzat e bëra mbrëmë nuk i kemi dëgjuar para publikimit të rezultatit të votimit në komunën e Podujevës. Viktimizimi i bazuar në shpifje nuk duhet të jetë arsyetim për humbje të një gare të pastër dhe korrekte”, shkroi Hyseni gjersa i ftoi të gjithë ata që kanë dëshmi për parregullësi në zgjedhjet lokale që t’i dorëzojnë para organeve të drejtësisë.