Gjermania dhe Italia po përballen me kushte të rënda atmosferike, ndërsa një valë e të nxehtit, e lidhur me dhjetëra vdekje në Evropën Perëndimore, po përhapet drejt lindjes. Temperaturat kanë thyer rekorde duke kaluar 40 °C. Danimarka regjistroi të shtunën temperaturën më të lartë që nga fillimi i matjeve në vitin 1874, duke arritur 36,6 °C në veri të Odensës. Sllovakia gjithashtu konfirmoi natën e së premtes si më të ngrohtën e regjistruar ndonjëherë, me temperatura që nuk ranë nën 26,3 °C.
Në Gjermani, shërbimi kombëtar meteorologjik raportoi një temperaturë paraprake prej 41,3 °C pranë qytetit të Saarbrücken-it. Autoritetet kanë lëshuar paralajmërime për nxehtësi ekstreme në pothuajse të gjithë vendin, duke u bërë thirrje qytetarëve të kursejnë ujin. Ndërkohë, Ministria e Shëndetësisë në Itali ka shpallur alarmin e kuq për 18 qytete, përfshirë Milanin, Romën, Torinon, Venecian, Xhenovan, Firencen dhe Bolonjën, ku temperaturat pritet të arrijnë deri në 39 °C.
Infrastruktura po përballet me vështirësi të mëdha. Operatori hekurudhor gjerman, Deutsche Bahn, u ka mundësuar klientëve anulimin e udhëtimeve të gjata pa pagesë deri në fillim të javës së ardhshme për shkak të rrezikut ndaj binarëve dhe linjave elektrike. Pranë Hamburgut, një pjesë e autostradës A7 u mbyll pasi nxehtësia shkaktoi çarjen e asfaltit. Në Francë, autoritetet raportojnë rritje të zjarreve në pyje krahasuar me vitin e kaluar, ndërsa temperaturat e larta kanë ndërprerë udhëtimet hekurudhore dhe kanë çuar në pezullimin e mësimit në shkolla.
Shkencëtarët vlerësojnë se kjo valë e të nxehtit do të kishte qenë praktikisht e pamundur pa ndryshimet klimatike të shkaktuara nga njeriu. Fenomeni, i njohur si "omega block", ka bërë që temperaturat të jenë deri në 18 °C mbi mesataren sezonale. Ndërsa kërkesa për pajisje ftohëse është rritur ndjeshëm, parashikimet tregojnë se nxehtësia ekstreme do të fillojë të zbehet gjatë fundjavës, me stuhi të forta të pritshme të dielën.
Burimi: theguardian.com