Kombëtarja e Gjermanisë është eliminuar nga Kupa e Botës në fazën e 32-shes, pasi u mposht nga Paraguai pas gjuajtjeve të penalltive. Ndeshja, e cila u zhvillua në stadiumin e Bostonit para 63,945 shikuesve, përfundoi me rezultatin 4-3 në favor të Paraguait pas ekzekutimit të penalltive.
Paraguai kaloi në avantazh në pjesën e parë falë një goli me kokë nga Julio Enciso. Gjermania arriti të barazojë rezultatin me anë të Kai Havertz, i cili shënoi me një goditje të lehtë. Gjatë pjesës së dytë të kohës shtesë, një gol i Jonathan Tah me kokë u anulua nga sistemi VAR për shkak të një faulli të Waldemar Anton ndaj portierit Orlando Gill.
Skuadra e drejtuar nga Julian Nagelsmann pati 78 për qind të zotërimit të topit në pjesën e parë, por nuk arriti të godiste asnjëherë portën. Në pjesën e dytë, loja e gjermanëve u përmirësua, megjithatë ata nuk arritën të siguronin fitoren përpara se të shkohej te penalltitë. Kjo ishte hera e parë që Gjermania humbet një seri penalltish në historinë e Kupës së Botës.
Në serinë e penalltive, Kai Havertz, Nick Woltemade dhe Jonathan Tah dështuan të shënonin, pasi goditjet e Havertz dhe Woltemade u pritën nga portieri Orlando Gill, ndërsa Tah gjuajti mbi portë. Nga ana tjetër, Paraguai humbi dy mundësi për të mbyllur ndeshjen, pasi Antonio Sanabria gjuajti jashtë, ndërsa Manuel Neuer priti goditjen e Fabian Balbuena.
Pas këtij rezultati, Paraguai kualifikohet për në fazën e 16-shes, ku do të përballet me fituesin e ndeshjes mes Francës dhe Suedisë. Gjermania vazhdon të mos ketë fituar asnjë ndeshje me eliminim direkt në Kupën e Botës që nga viti 2014. Jose Canale ishte lojtari që vulosi kualifikimin e Paraguait pas gabimeve të gjermanëve nga pika e bardhë.
Burimi: skysports.com