Kuba ka përjetuar ndërprerjen e tretë mbarëkombëtare të energjisë elektrike që nga fillimi i vitit, ndërsa rezervat e karburantit po pakësohen dhe rrjeti elektrik po përballet me vështirësi të mëdha. Kjo situatë vjen si pasojë e krizës energjetike, për të cilën autoritetet kubane fajësojnë bllokadën amerikane të karburantit.
Ndërprerja në vendin me rreth 10 milionë banorë u raportua të hënën nga Unioni shtetëror i Elektrikës (UNE), i cili bëri të ditur se shkaku i këtij kolapsi është ende nën hetim. Ministri i Energjisë dhe Minierave, Vicente de la O Levy, deklaroi se janë aktivizuar protokollet për rikthimin e energjisë në të gjithë territorin e vendit.
Megjithatë, deri në orët e vona të pasdites, operatori arriti të mbulojë vetëm 1 për qind të kërkesës për energji në kryeqytetin Havana.
Presidenti i Kubës, Miguel Díaz-Canel, akuzoi Shtetet e Bashkuara për përpjekje për të nxitur trazira shoqërore përmes kufizimit të furnizimeve me karburant. Ai vlerësoi punën e punonjësve të sektorit elektrik, duke i cilësuar veprimet e tyre si heroike në mes të një bllokade energjetike.
Shteti ka aplikuar ndërprerje të vazhdueshme të energjisë në përpjekje për të ruajtur rezervat e karburantit, duke lënë disa zona të Havanës pa drita për mbi 30 orë, ndërsa në zonat rurale ndërprerjet kanë kaluar 70 orë.
Meyboll Font, një 51-vjeçare që punon si menaxhere e komuniteteve në rrjetet sociale, përshkroi për agjencinë AFP vështirësitë e jetesës në këto kushte. Ajo theksoi se lagjja e saj mbijeton me vetëm tre ose katër orë energji në ditë, duke shtuar se pasiguria për rikthimin e dritave e bën situatën edhe më të rëndë.
Burimi: aljazeera.com