Një zjarr i përmasave të mëdha ka përfshirë sipërfaqe me bimësi dhe shkurre në zonën e Llamanit në Himarë. Mësohet se flakët janë përhapur me shpejtësi, të favorizuara nga temperaturat e larta dhe era, duke rrezikuar të përfshijnë një sipërfaqe edhe më të madhe toke.
Në vendngjarje ndodhen pesë mjete të forcave zjarrfikëse, të cilat po punojnë intensivisht për shuarjen e flakëve dhe vënien e situatës nën kontroll. Në operacion janë angazhuar edhe efektivë të shërbimeve të emergjencës, të cilët po monitorojnë zhvillimin e situatës dhe po ndërhyjnë në pikat më problematike.
Deri në këto momente nuk raportohen persona të lënduar apo banesa të rrezikuara, ndërsa puna e zjarrfikësve vijon pa ndërprerje për izolimin e vatrës së zjarrit dhe parandalimin e përhapjes së mëtejshme të flakëve.