Andy Burnham është në rrugë të mbarë për t’u bërë kryeministri i ardhshëm i Britanisë së Madhe, pasi ka siguruar mbështetjen e më shumë se 85 për qind të deputetëve të Partisë Laburiste në pushtet. Me 349 deputetë që mbështesin kandidaturën e tij, Burnham nuk mund të sfidohet nga asnjë kandidat tjetër, pasi rregullat kërkojnë mbështetjen e 20 për qind të partisë për të hyrë në garë.
Burnham, ish-kryetar i Greater Manchester dhe ish-ministër në qeveritë e Tony Blair dhe Gordon Brown, u zgjodh deputet për Makerfield muajin e kaluar. Ai ka konfirmuar se, nëse do të jetë i suksesshëm, do të zëvendësojë Keir Starmer në postin e kryeministrit.
Ai u përball me akuza për skandale të ndryshme dhe dështim në artikulimin e një vizioni të qartë për vendin. Ndërkohë, dhjetëra mijëra anëtarë të Partisë Laburiste janë larguar nga radhët e saj për shkak të qëndrimit të qeverisë ndaj luftës në Gaza.
Në përpjekje për të zbutur pakënaqësitë, Burnham kërkoi falje javën e kaluar për qëndrimin e partisë, duke deklaruar se ajo nuk kishte vepruar siç duhet dhe premtoi të ushtrojë më shumë presion ndaj Izraelit. Për sa i përket politikave të brendshme, ai është zotuar se do t’u japë më shumë autonomi dhe pushtet zonave jashtë Londrës.
Gareth Dale, akademik në Universitetin Brunel, vlerëson se Burnham përballet me sfida të mëdha. Sipas tij, mbështetja për Partinë Laburiste ka rënë ndjeshëm që nga periudha e Jeremy Corbyn, ndërsa votat kanë kaluar te Partia e Gjelbër. Dale thekson se për të rimarrë mbështetjen e këtyre votuesve, Burnham do të duhet të ndjekë politika të majta në çështjet e varfërisë, emigracionit, mjedisit dhe Palestinës.
Burimi: aljazeera.com