Regjisori fitues i çmimit Oscar, Christopher Nolan, filmi i të cilit “The Odyssey” po shënon sukses në kinematë botërore, ka shprehur qëndrimin e tij ndaj inteligjencës artificiale. Në një intervistë me Hugo Travers, i njohur në YouTube si HugoDécrypte, Nolan e përshkroi inteligjencën artificiale si një “kalë trojan” që të gjithë e dinë se çfarë fsheh brenda.
Travers e krahasoi teknologjinë me kalin legjendar të Trojës, duke ngritur pyetjen nëse AI mund të jetë diçka që pranohet në jetën e përditshme, por që mund të shndërrohet në diçka më të errët.
Nolan vuri në dukje se është inkurajuese të shohësh skepticizmin e publikut ndaj kësaj teknologjie, veçanërisht tek të rinjtë. Sipas regjisorit, ky është një skepticizëm i shëndetshëm, pasi teknologjia dhe motivet e atyre që e ofrojnë atë duhet të vlerësohen me kujdes, në vend që të pranohen me besim të verbër.
Si president i Directors Guild of America, Nolan kujtoi se inteligjenca artificiale ka qenë një burim shqetësimi në Hollywood, duke qenë në qendër të grevave të shkrimtarëve dhe aktorëve në vitin 2023. Sindikata e tij ka arritur të sigurojë disa mbrojtje lidhur me përdorimin e inteligjencës artificiale gjeneruese në kontratën e fundit.
Nolan, i cili njihet për qëndrimin e tij ndaj teknologjisë, e përshkroi veten si “teknoskeptik” në një bisedë të fundit me The New York Times. Ai theksoi se dashuria e tij për filmin buron nga aftësia e tij për të përfaqësuar botën ashtu siç e sheh syri njerëzor, më mirë se çdo sistem dixhital.
Regjisori shpjegoi se ai përqafon teknologjinë e re, por paralajmëroi kundër tendencës për të zëvendësuar sistemet ekzistuese që mbeten të vlefshme. Ai theksoi se industria e filmit rrezikoi të humbiste formatin e filmit tradicional për shkak të kësaj qasjeje.
Burimi: techcrunch.com