Kryetari i Lidhjes Demokratike të Kosovës, Lumir Abdixhiku ka paralajmëruar denoncimin në Prokurorinë e Shtetit të aferës së punësimeve në Korporatën Energjetike të Kosovës.
Në një shkrim në Facebook, ai ka bërë të ditur se pas publikimit nga Paparaci të skandalit të punësimeve në KEK, nesër do t’i drejtohet Prokurorisë.
Abdixhiku, ka shkruar se ky konkurs “është kryekëput nepotist dhe është bërë për punësim të familjarëve e aktivistëve të Vetëvendosjes”.
Ai ka shkruar se LDK-ja do të kundërshtojë të gjitha format e nepotizmit edhe pse janë në opozitë.
Një hulumtim i Paparacit, i publikuar të hënën, nxjerri në pah shkeljet e rënda ligjore në procesin e rekrutimit të 128 punëtorëve në një konkurs të Korporatës Energjetike të Kosovës.
Njerëz të afërt me Lëvizjen Vetëvendosje në pushtet, si dhe të afërm të anëtarëve të komisionit intervistues të punësimit, figurojnë në mesin e të punësuarve në KEK.
Në këtë konkurs në të cilin janë pranuar 128 persona, 120 prej tyre janë të afërm me partinë në pushtet. 40 të tjerë, kanë deklaruar haptazi se kanë familjarë të punësuar në ndërmarrjen publike.
Nepotizëm, konflikt interesi, punësime militantësh – krimi i pushtetit me punësime në KEK