Komisioni për Buxhet dhe Financa i Kuvendit të Kosovës ka hedhur poshtë iniciativën për tërheqjen e një pjese të mjeteve nga Trusti, në mbledhjen e mbajtur sot.
Kësisoj, Projektligji për Fondet Pensionale do t’i kalojë kuvendit në seancë plenare për shqyrtim në lexim të parë, pa mbështetjen e komisionit funksional.
Pesë anëtarë votuan për dhe pesë kundër propozimit të iniciuar nga Partia Demokratike e Kosovës, ndërkaq një anëtare, Duda Balje nga Grupi Parlamentar 6+, abstenoi.
“Jemi pesë me pesë dhe një abstenim”, tha kryesuesi i komisionit, deputeti i shumicës qeverisëse, Armend Muja. “Ky propozim nuk e ka marrë miratimin e komisionit”.
Përfaqësuesit e shumicës qeverisëse të Lëvizjes Vetëvendosje votuan kundër miratimit të rekomandimit për iniciativën, ndërkaq pesë anëtarët e opozitës votuan pro.
Në mbledhjen e sotme të komisionit, mori pjesë edhe deputeti që inicioi propozimet për ndryshimet ligjore në Ligjin për Fondet Pensionale, Bekim Haxhiu i Partisë Demokratike të Kosovës.
Ai, prezantoi para anëtarëve të komisionit propozimet për mundësimin e qytetarëve që të tërheqin një pjesë të mjeteve të tyre të kursyera në Fondet Pensionale.
Përfaqësuesi i Lëvizjes Vetëvendosje, Armend Muja kundërshtoi zëshëm iniciativën. Ai tha se kjo nismë është “skandaloze dhe abuzive”, si dhe sipas tij, ajo rrezikon Fondet Pensionale të Kosovës.