Agjencia për Informim dhe Privatësi ka zhvilluar inspektim lidhur me mbikëqyrjen e ligjshmërisë së përpunimit të të dhënave biometrike (tiparet e fytyrës) për qëllim të identifikimit të punonjësve gjatë regjistrimit të tyre në hyrje-dalje nga puna në kompaninë KRU Hidrodini, raporton Paparaci.
Me këtë rast, pas përfundimit të procedurave të inspektimit i cili filloi më 27 maj, Agjencia mori vendim të hënën, teksa ka ndaluar përpunimin e të dhënave biometrike.
Po ashtu, e njëjta e ka obliguar fshirjen dhe shkatërrimin e tyre.
“Andaj, Agjencia për Informim dhe Privatësi ju rikujton se Ligji Nr. 06/L-082 për Mbrojtjen e të Dhënave Personale ka përcaktuar se përpunimi I të dhënave biometrike për qëllim të identifikimit të një personi fizik në mënyrë unike, parimisht është I ndaluar”, thuhet në njoftimin e AIP.
Sipas Agjencisë,, ky përpunim mund të bëhet vetëm nëse domosdoshmërish kërkohet për sigurinë e njerëzve, pronës, mbrojtjen e të dhënave konfidenciale dhe sekreteve të bizneseve, nëse kjo nuk mund të arrihet me mjete më të lehta dhe duhet të jetë proporcional me qëllimin e vendosjes.